ملاحظات على الحلقة الثالثة من «Game of Thrones»

الموسم الأخير، الحلقة الثالثة، «The Long Night»

لوقت طويل ما كنتش فاهم ولا مهتم بالانقسام الكبير في القاعدة الجماهيرية لـ«Star Wars» بعد «The Last Jedi».

عن نفسي شايفه فيلم جيِّد ومسلِّي والتمثيل فيه قوي، وإن كان مليان ثغرات في الحبكة تعدِّي قطيع أفيال الجماعة الذهبيَّة، وفيه مشاهد كان ممكن الاستغناء عنها بسهولة من غير ما تتغيَّر حاجة في القصة. «Star Wars» لمن لا يعلم أكبر من «Game of Thrones» عشرات المرَّات، لكن على عكس قطاع عريض من قاعدتها الجماهيرية، اتفرَّجت على السلسلة متأخَّر وعجبتني حاجات كتير جدًّا فيها، وفيه حاجات شوفتها في منتهى السخافة. زي أي فيلم أو مسلسل يعني. ما كنتش زيهم مهتم ومتابع من البداية، ففضلت بعيد عن الخناقات العاصفة اللي دارت على الإنترنت بين أغلبيَّة بتكره الفيلم وشايفة إنه دمَّر السلسلة، وأقليَّة شايفة الفيلم جيِّد جدًّا، وأقليَّة أقل زي حالي كده.

لكن أول حاجة جات على بالي بعد الحلقة الثالثة هي الحالة الغريبة اللي خلقها «The Last Jedi»، مش بس في التشابه العام مع حالة «Game of Thrones»، لأني كنت متأكد بمجرَّد نزول تترات النهاية، وقبل ما أفتح الإنترنت، إن هيكون فيه انقسام على الحلقة دي. السبب الثاني إن فيه مشاهد بعينها في الحلقة فكَّرتني بالفيلم. فيه شخصيَّة بتُلقى عليها قوَّة نارية هائلة، وبمجرَّد انطفاء النار يتَّضح إنها سليمة تمامًا، وحتى رد فعلها شبيه برد فعل ملك الليل. فيه شخصيَّة بتموت بنفس الحركة تقريبًا اللي مات بيها ملك الليل. العدو الأكبر بيموت قرب أواخر الفيلم الثاني من ثلاثية فجأة دون إجابة عن الأسئلة اللي مثارة عنه من الجزء الأول. شخصيَّة رئيسيَّة مهمَّة موجودة من أول فيلم في السلسلة كان دورها مهمَّش تمامًا وما قامتش بأي حاجة مفيدة تقريبًا. استراتيچية عسكرية ما فيهاش منطق ولا استراتيچية.

الكلام ده مألوف؟

وبعد كده تفتح الإنترنت تلاقي رايان چونسون مخرج الفيلم كاتب تويتة بيسخر فيها من محبِّي المسلسل اللي ما عجبتهمش النهاية.

وتفتكر إن ديڤيد بنيوف ودان وايس متفقين مع ديزني بالفعل إنهم يكتبوا ثلاثية جديدة لـ«Star Wars» بالتعاون مع رايان چونسون.

وتفهم دلوقت ليه عشَّاق «Star Wars» الأصليِّين بيكرهوا «The Last Jedi»، لأن رغم كونه في حد ذاته فيلم جيِّد، لكن في السياق العام للسلسلة بيخالف كل حاجة مبنيَّة تقريبًا، وهو ما وصفه چونسون بـ«الإطاحة بالتوقُّعات»، وهو الشيء اللي من حيث المبدأ ما عنديش مشكلة معاه، بل بحبِّذه، لأني بحب أتفاجئ، لكن فقط لمَّا يبقى متقدِّم بشكل متَّسق مع القصَّة العامَّة، مع البناء والتلميحات والإسقاطات والتمهيد، ولمَّا ترجع له تحس إنه فعلًا تطوُّر طبيعي للقصَّة مش دخيل عليها. الإطاحة بالتوقُّعات لمجرَّد المفاجأة حيلة رخيصة مش بيلجأ ليها إلا كاتب ضعيف أو كاتب زنق نفسه في ركن ومش عارف يخرج منه.

توقُّعاتنا أطيح بيها لمَّا ند ستارك مات، ولمَّا روب وكاتلين ستارك ماتوا، ولمَّا أوبرين مارتل مات، وچوفري، وتايوين، وستانيس، وچون سنو، ولمَّا تسترجع كل ده هتلاقيه متَّسق تمامًا مع القصَّة وممهَّد له ورغم ذلك فاجئ الجميع.

مشاعري ناحية الحلقة زي مشاعري ناحية «The Last Jedi». في حد ذاتها حلقة جيِّدة لا تخلو من عيوب، لكن لمَّا تحطَّها في السياق العام للمسلسل فهي حلقة متوسِّطة المستوى على الأكثر، فلو ما كنتش اكتفيت من التحليلات اللي مغرَّقة الإنترنت سواء بالسلب أو الإيجاب، ولو ما عندكش مشكلة تقرأ كلام مكرَّر -لأني أكيد مش هكون أول واحد بيقوله- ولو ما كنتش من شريحة المشاهدين اللي بتقول إن ما دام العمل فانتازيا فالمفروض ما أدوَّرش على منطق (ودي إهانة للفانتازيا)، فهحاول أختصر الكام نقطة اللي عندي.

الحلقة حلوة في إن:

- التليفزيون وسيط بصري بالأساس، يعني في حلقة زي دي تحديدًا الاعتماد على حكاية القصَّة بالصورة أكثر من الحوار، وده نجحوا فيه تمامًا. الحوار في الحلقة قليل جدًّا، والباقي كله محكي بالصورة ببراعة.

- ما فيهاش لحظة مملَّة.

- فيها مجموعة لقطات عبقريَّة وفي غاية الجمال، أظن معظمنا إن لم يكن كلنا حتى اللي كاره الحلقة متَّفق عليها.

- الموسيقى كالعادة (ولو إني شخصيًّا رغم جمال المقطوعة الأخيرة حسِّيت كأن چاوادي كاتبها لـ«Westworld»).

- بناء التوتُّر والترقُّب معمول بإتقان شديد من أول لحظة خلال العشر دقائق الأولى تحديدًا، وفي الدقائق الأخيرة كمان.

- التلاعب بالمشاهد وإعطاؤه إحساس بالأمل، زي مشهد إشعال الأراخات، أو دخول التنانين، أو اشتعال الخندق، وبعدين إخماد الأمل مع النار.
- أسلوب قتال المطهَّرين وصمودهم مخلص جدًّا للروايات.

- شخصيَّات عادةً شُجاعة بتفقد شجاعتها في مواجهة الخطر الرهيب، زي ساندور وآريا، وحتى سام اللي كان تغلَّب على خوفه.

لكن للأسف ده كل اللي عاجبني فيها.

العيوب اللي شايفها عن نفسي قد تتَّفق أو تختلف مع غيري، لكن هي أكثر حاجات عندي مشاكل معاها:

- جوست

بيعمل إيه على خط الهجوم الأول؟ إيه اللي ممكن يضيفه ذئب هنا؟ هيعض الموتى؟ فاكرين سَمر مات إزاي؟ إزاي چون يسيبه يموت في موجة الهجوم الأولى؟ طبعًا هو ما ماتش وده أغرب، لكن على الأقل ما ماتش off-screen. ليه جوست ما يكونش في السراديب بيحمي سانزا أو حتى في أيكة الآلهة بيساعد على حماية بران؟ روب ستارك كان بيخلِّي جراي ويند يحارب معاه لأنه عنصر قوي في إيقاع الرعب في قلب العدو، لكن العدو اللي بيواجهوه المرَّة دي ما يعرفش الخوف!

- خطة الدفاع

أقول إيه عن خطة الدفاع؟ أنا من إمتى خبير عسكري بيفهم في استراتيچيات القتال في العصور الوسطى؟ أنا مش كده، بس أظن إني ترجمت ما يكفي من المعارك اللي من النوع ده، ورجعت لكتب تاريخ لترجمة المعارك دي، فعندي على الأقل معرفة عامَّة بأساليب القتال وأساسيَّات المعارك والحصار.

من الأساسيَّات دي إنك لو في قلعة فالقلعة أهم دفاع عندك. حُط أكبر عدد ممكن من الرُّماة على الأسوار، وخلِّيهم يتبادلوا الضَّرب علشان تكون فيه فرصة للراحة. في الحالة دي قبل ما العدو يوصل لك هتكون أصبت عدد لا بأس بيه منه. السهام النارية في عالم الواقع عديمة الفائدة وبتنطفي في الحال تقريبًا وقلما بتسبِّب ضرر (وهم كانوا مخلصين في الجزء ده)، لكن لحسن الحظ إن العدو اللي بيهاجمك بيموت بالنار. اللي شوفناه في الحلقة عدد قليل من الرُّماة، مع إن الدوثراكي نفسهم بينهم رُماة كتير، ده غير إن أي حد يعرف يمسك قوس ممكن يقوم بالمهمَّة دي. خليك فاكر إن عندك قلعة أسوارها عالية، والقلعة واضح تمامًا إن كان فيها مساحات كافية تضم أعداد أكبر.

لو هتحفر خندق احفره على مسافة واسعة تضم جيشك واملاه بالخوازيق. في الحالة دي جيش الموتى هيفقد عدد كبير منه مع موجة الهجوم الأولى، وهيقل التدافع وهياخدوا فترة على بال ما يعرفوا يعدُّوا بينما رُماتك طول الوقت بيمطروهم بالسهام. الرُّماة ممكن يكونوا خارج القلعة ورا خط المشاة على فكرة. وآه، ما فيش حد بيحط المجانيق بتاعته أمام خط المشاة الأول. المنجنيق بيكون داخل القلعة وبيضرب باستمرار ما دام رجالك مش في مرماه، أو على الأقل ورا المشاة. كل اللي شوفناه المجانيق بتضرب مرَّة أو مرِّتين وبعدها أصبحت بلا فائدة.

الغرض الأساسي من الهجمة الأولى لسلاح الفرسان في أي معركة هي إيقاع الصدمة في قلب العدو وتشتيت صفوفه الأولى، ده لو كان سلاح فرسان بخيول ثقيلة، يعني الفارس والفرس مدرَّعين، والفارس بيقاتل بسيف طويل أو رمح. لو سلاح فرسان بخيول خفيفة زي الدوثراكي، ما ينفعش يهجموا من غير دعم المشاة. ثم كانت إيه الخطة قبل ما مليساندرا تظهر من العدم (كان مشهد cool رغم ذلك) وتولَّع النار في الأراخات؟ إن الدوثراكي يهجموا بأسلحتهم العادية اللي هي حديد أو فولاذ؟ مين العبقري اللي بعتهم في الهجمة الانتحارية دي؟ ما طبيعي يُكتسحوا في ثواني. مفهوم إن الدوثراكي قوَّة هجوم أصلًا لأنهم غزاة ومتعوِّدين على الهجوم مش الدفاع، لكن ليه تضحِّي بيهم كلهم مرَّة واحدة؟ ما هو تايوين لانستر ما خلِّفش. بفرض إن داني ملهاش في التكتيك العسكري وچون غبي، لا چايمي ولا تيريون انتبهوا لغباء الحركة؟ ولا حد فيهم قال إن المفروض ينتظروا الموتى يهجموا بجيث يصدُّهم المطهَّرين بالتُّروس من القلب ويكر عليهم الدوثراكي من الميمنة والميسرة؟ مين اللي يبعت جيش كامل يواجه عدو مش شايفه من غير سلاح فعَّال؟!

لمَّا إحنا المشاهدين العاديِّين نقول الكلام ده، HBO مش عارفة تجيب مستشار عسكري يوجِّه المعارك؟ ده تهريج!
ديڤيد ودان وناس تانية بتقول إن دنيرس خالفت الخطة. فعلًا؟ يعني كان المفروض تسيب الطوفان يكتسح الأحياء من غير ما تتدخَّل؟ 

- الإضاءة والمونتاچ.

ما فيش شك إن الصورة كانت ضلمة، ولمَّا الشكوى تكون عالميَّة فالعيب في مدير الإضاءة. هبل إنه يقول للناس إنهم مش بيعرفوا يضبطوا تليفزيوناتهم. المسلسل طول عمره ضلمة لكن مش بالشكل ده. قبل كده شوفنا معركتين ليليتين بوضوح تام. أنا نفسي عندي تليفزيون حديث جدًّا واتفرَّجت على نسخة مساحتها كبيرة وكانت عندي نفس المشكلة، ولمَّا رفعت الـbrightness الصورة أصبحت سيئة رغم الوضوح. إلى حدٍّ ما متفهِّم الإحساس اللي كان المخرج عايز يوصَّله للمشاهد، وإنه يحطُّه في نفس جو الفوضى والاضطراب اللي فيه الشخصيَّات، لكن مش متَّفق مع الاختيار لأن ده كان ممكن برضه بصورة أوضح شويَّة. طبعًا السبب الأهم إن التصوير الليلي بيداري عيوب كتير في الـCGI والصُّور اللي الـrendering بتاعها ما اكتملش.

تكنيك الكاميرا المهزوزة ما حدِّش في هوليوود عرف يستخدمه صح إلا قلائل من وقت ما قدِّمه پول جرينجراس في أفلام «Bourne»، وهنا خلَّا الواحد كتير ما يعرفش إيه اللي بيحصل أو مين أصلًا اللي على الشاشة.

المونتاچ أسوأ حاجة تقنيَّة في الحلقة دي. كام مرَّة تكون شخصيَّة في خطر شديد والموتى متكدِّسين عليها والمشهد يقطع ولمَّا نرجع للشخصيَّة تكون تمام وما حصلَّهاش حاجة؟ آه، وبالمناسبة دي، كام كام مرَّة تكون شخصيَّة في خطر شديد والموتى متكدِّسين عليها وحد ينقذها على آخر لحظة؟ بالمنظر ده قتلوا التعطيل الإرادي لعدم التصديق عندي، لأني خلاص ما عدتش خايف على الشخصيَّة، لأني متأكِّد إن لمَّا نرجع لها هتكون تمام. مرَّة أو مرِّتين كفاية، لكن كام مرَّة شوفنا سام على الأرض وسط الجثث بيعيَّط وبيحاول يدافع عن نفسه؟ كام مرَّة بِريان تقع وتختفي وسط الجثث الحية وينقذها چايمي والعكس؟ وپودريك؟ وتورموند؟ وجندري؟

- وده ينقلنا للسبب اللي غايظ ناس كتير وأنا منهم، إن كذا شخصيَّة كان المفروض تموت وما حصلش. فاكرين لمَّا الموت كان ليه معنى في المسلسل؟ ولمَّا الشخصيَّات الأساسية كانت بتموت؟ إحنا كنا مهيَّئين نفسيًّا بعد الحلقة الثانية. دلوقت الحلقة الثانية أصبحت بدون معنى. چورا مش شخصيَّة رئيسيَّة، ولا مليساندرا، ولا بريك دونداريون. كلهم شخصيات صف تاني. يعني والدر فراي قتل شخصيات صف أول أكتر من ملك الليل. مع ذلك مشهد موت ثيون كان مؤثِّر، ومشهد چورا رغم إنه كان داخل القلعة وظهر ينقذ دنيرس من اللا مكان، والسخرية الشعرية هنا إنه دافع عن دنيرس بسيف راندل تارلي. وداڤوس كان فين طول المعركة؟ ولا لقطة ظهر بيقاتل فيها وهو مقاتل سيئ باعترافه. أنا بحب داڤوس جدًّا لكن كان المفروض يموت.

- زي ما توقَّع كتير، ملك الليل قوِّم الجثث اللي في السراديب... واتَّضح بالفعل إن السراديب أكثر مكان آمن في القلعة، لأن ما حصلش حاجة تقريبًا. على كل حال مش متوقَّع من جثث مدفونة بدون أسلحة ومر عليها سنين إنها تعمل أذى كبير، لكن ليه ما استغلُّوش الفرصة في إن حد من عيلة سانزا مثلًا يحاول يقتلها؟ بلاش ند (وليه مقبرة ند فضلت سليمة؟ يمكن لأنه مات بالفولاذ الڤاليري أصلًا). لكن ليه مش ريكون (اللي مقبرته برضه فضلت سليمة)؟ تخيَّل مشاعر سانزا وهي بتواجه جثة أخوها الصغير اللي تخلِّت عن الأمل في إنقاذه وضحِّت بيه. في السياق ده، الشخصيات اللي نعرفها وماتت، ليه ما استغلُّوش فرصة نشوفها بتقتل البشر؟ ليانا وإد وبريك، لو ده حصل كان هيبقى قاسي ومؤلم لكن بيعزِّز فكرة الرعب.

بالمناسبة، أول جثة قامت في السراديب افتكرتها المِايستر لوين، لكن افتكرت بعدها إنه مات في أيكة الآلهة، وما ظنش حد من جنود بولتون كلِّف خاطره يدفنه في السراديب.

ولمَّا الجثث قامت في المكان المغلق على ساندور ومليساندرا بعد ما آريا سابتهم؟ دول كانوا عشرات.

- بران ما عملش أي حاجة، لكن أنا في الحقيقة مش عارف أفكَّر في حاجة كان ممكن يعملها، ما لم يكن چون انتظر معاه لحد ما يقول له إن ملك الليل جاي من البقعة الفلانية. طبعًا انتظرت إن محور قصته كلها يكون ليه لازمة ويدِّينا أي معلومة مفيدة، لكن ده طبعًا ما حصلش. رحلة بران كلها كان الغرض منها يكون هارد دسك متخزِّن عليه معلومات.

- النقطة قبل الأخيرة من أكبر نقطتين محل جدل: هل كان المفروض آريا هي اللي تقتل ملك الليل؟

ناس كتير بتقول إن مشكلتها إن آريا اللي قتلته، وإنما الطريقة اللي قتلته بيها. طبعًا وعندهم حق. سخافة إن آريا فجأة تعرف تتخطَّى كل الجحافل اللي غزت القلعة وتوصل أيكة الآلهة. سخافة إن آريا تعرف تتجاوز بمعجزةٍ ما حلقة الوايت ووكرز والجثث اللي محيطة ببران وتنقض على ملك الليل من اللا مكان. كان ممكن على الأقل تكون مستخبيَّة فوق الشجرة. كان ممكن تدريبها مع عديمي الوجوه تكون ليه فايدة حقيقيَّة هنا. سخافة إن الكتَّاب -باعترافهم- يقولوا إنهم قرَّروا من 3 سنين بس إنها آريا، وبالشكل ده يغيَّروا بأثر رجعي سياق كلام اتقال في الموسم الثالث. حتى ترتيب ألوان العيون كان غلط! المرة دي أصبح الأزرق في الآخر علشان الوقع الدرامي وبس، في حين كانت نبوءة مليساندرا في وقتها تخص قائمة آريا فقط.

لكن أنا عندي مشكلة في إن آريا اللي قتلته. بالأحرى، إنها قتلته لوحدها. كان هيبقى أروع أد إيه لو كان مجهود جماعي؟ أولًا فرصة عظيمة نشوف فيها چون وآريا بيقاتلوا جنبًا إلى جنب. ثانيًا ده يخلِّي ملك الليل مخيف أكثر. ثالثًا على الأقل هيكون فيه نوع من المواجهة الأخيرة بينه وبين چون بعد مواجهة النظرات اللي هيَّأتنا لده من سنين وخلَّانا ننتظره.

بالمناسبة، كون الفولاذ الڤاليري هو القادر على قتل ملك الليل بينما نيران التنِّين لأ مش شايف فيه مشكلة. إحنا عارفين من قبل كده إن ملك الليل قادر على إخماد النار العادية ونار التنانين، وما فيش حاجة بتقول إنه مش مضاد لنار التنانين، خصوصًا إن الأوبسيديان اللي في قلبه ما هو إلا نار مجمَّدة، يعني هو حي بسبب النار، بينما ما فيش حاجة بتقول بشكل قاطع إن التنانين ليها دخل في تشكيل الفولاذ الڤاليري. مشكلتي إن الكتَّاب بيقولوا إنها ضربته في نفس الموضع، بينما باين يوضوح إنها ضربته في المعدة. يعني حتى مش فاكرين اللي كتبتوه.

فيه لقطة طريفة، إن آريا أصلًا عسراء، وبتظهر دايمًا ماسكة سلاحها بالشمال، وفي النهاية بتقتل ملك الليل باليمين.

- النقطة الأخيرة محل الجدل هي الدهشة من القضاء على ملك الليل بالسهولة دي، والرد بإن المسلسل أصلًا سياسي وما إلى ذلك. طيِّب، رأيي إنهم زنقوا نفسهم في ركن في الكتابة. لو ما كانش ملك الليل مات هنا فمعنى كده إن المسلسل انتهى، أو على الأقل المواجهة الأخيرة هتكون بينه وبين سرسي دون كل الناس. فيه ناس كانت متوقِّعة ده يحصل بالمناسبة. لكن طبعًا دراميًّا عبث إن كل اللي في وينترفل يموتوا في المعركة وتنتهي قصتهم على كده.

الفكرة إنك بتحذَّر من أول مشهد في أول موسم من الخطر العظيم، والبناء مستمر ليه على مر السنين، فلمَّا ينتهي في حلقة واحدة وبعد معركة واحدة، دي خيبة أمل كبيرة. من أول حلقة بنسمع إن الشتاء قادم، لكن الحقيقة إن الشتاء أطاح بقلعتين صغيرين فيهم عدد محدود من البشر، واتهزم عند القلعة الثالثة وبس (بتكلِّم هنا عن الشتاء المجازي مش الفعلي). الخطر اللي المفروض كان عالمي -مع إنه عمليًّا خطر على وستروس بس- بدأ وانتهى في الشمال، أمَّا الجنوبيِّين فما اختبروهوش بأي شكل ولا اتأثَّروا بيه ولا عنوا بسببه وهيفضل بالنسبة لهم مجرَّد أسطورة. سرسي اللي مدركة الخطر وتجاهلته علشان مصلحتها الخاصَّة مش هتحتك بالخطر ده نهائي ولا تشوف فداحته بعينها. الموتى كان آخرهم في وينترفل، لا هزموا البشر واستطاع البشر ينسحبوا جنوبًا أو لجُزر الحديد أو حتى دراجونستون، ولا هدِّدوا أي قلعة بعد وينترفل إطلاقًا، ولا فيه ذروة في كينجز لاندنج يكون البشر على أحزابهم كلهم أطراف فيها، بحيث الخيوط الدراميَّة كلها تتجمَّع مع بعضها، الخير والشر والموت. ده اللي كنت أحب أشوفه.

أمَّا كون المسلسل أصلًا اسمه «لعبة العروش» والصراع الأساسي فيه على العرش؟ لو الكتَّاب مش مدركين إن الرسالة إن العرش مش مهم، إن كل ده كلام فارغ مقارنةً بالخطر اللي بيهدِّد الجميع، فأنا مش عارف بيكتبوا ليه. لو نسيوا اللي قالته مليساندرا عن إن حرب الملوك الخمسة ما لهاش قيمة مقارنةً بخطر الموتى، وزيها حرب الملكتين دلوقت، فأنا مش عارف بيكتبوا ليه. دلوقت هنرجع تاني للصراع الأقل إثارة للاهتمام، الصراع التافه على الحكم اللي هو عكس كل حاجة ذات قيمة المفروض نستنتجها من المسلسل. وليه أهتم بمصاير ناس مجرَّد ما انتهت الحرب الأهم مصرَّة تسعى في حروب تافهة؟ الحرب الأخيرة؟ فعلًا؟ يعني ما حدِّش اتعلِّم حاجة؟ فيه حاجة اسمها الحرب الأخيرة؟

من الأمانة هنا إني أقول إن ده قد يكون اللي هيعمله مارتن في الكتاب الأخير -لو كتبه- لأنه ذكر قبل كده كتير تأثير تولكين عليه، واختص بالكلام إعجابه بالفصل الأخير في «سيِّد الخواتم» اللي اسمه «The Scouring of the Shire»، اللي بيرجع فيه الهوبيت بلدهم بعد الانتصار على ساورون، وبيلاقوها محتلَّة من سارومان والأورك وبيقاتلوهم. قال إنه لما قرأ الرواية أول مرة وهو عنده 13 سنة ما استوعبش سبب وجود فصل زي ده، لكن لما كبر أدرك عبقريَّته. ربما حاجة زي دي هتحصل، لكن لاحظ الفرق بين تطهير وطن من عدو والقتال على عرش.

وبخصوص كون نبوءة الأمير الموعود طلعت أي كلام (ما فيش آزور آهاي في المسلسل)، فده حقيقةً متَّسق مع رؤية مارتن للنبوءة بشكل عام، وإنها شيء حمَّال أوجه وخدَّاع. كم جريمة ارتكبتها مليساندرا علشان تحقَّق النبوءة؟ وستانيس وسيليس؟ وكام مرَّة كانت غلطانة؟ أنا راضي عن ده تمامًا. ممكن نقول إنه چون لأنه رجع من الموت ووحِّد الصفوف إلخ... وده برضه راضي عنه. ما فيش حاجة في النبوءة بتقول بشكل خاص على العموم إن الأمير الموعود هيقتل بنفسه قائد الأعداء.

حاجات كنت عايز أشوفها بشكل شخصي:

- جحافل الدوثراكي الموتى تظهر ولو في مشهد سريع لحظة ما ملك الليل رفع إيده.

- حوار قصير أخير بين مليساندرا وداڤوس قبل ما تموت.

-  چون كان على الأقل يقتل التنِّين بالفولاذ الڤاليري بدل ما يصرخ في وشُّه! طبعًا نقطة التنِّين دي الكتَّاب بيناقضوا نفسهم فيها زي ما عملوا كتير قبل كده (راجع الوايتس بيعوموا ولا لأ)، لمَّا قالوا قبل كده إن التنِّين وايت ووكر علشان ملك الليل حوِّله بإيده، بينما مات زي الوايتس في الحلقة.

- أي ملعومات مفيدة عن الوايت ووكرز وليه اختاروا يرجعوا دلوقت بالذات!

ملاحظات هامشيَّة: 
- ما فيش كاتب في هوليوود تقريبًا بيقدر يقاوم محاكاة الصُّور الدينيَّة، زي وضع صلب المسيح مثلًا أو العشاء الأخير. أحيانًا بتكون في محلَّها وأحيانًا بتكون مقحمة. هنا فيه أمثلة زي وضع صلب المسيح في مشهد طعن بريك، وطعن ثيون مكان طعن المسيح، وطبعًا صورة داوود وجالوت في مشهد ليانا والعملاق. إلى حدٍّ ما حاسس المحاكاة دي مقحمة، لكن ما عنديش مشكلة معاها.
- ما زالت المعارك في «The Lord of the Rings» و«Waterloo» الأفضل في تاريخ السينما، و«Battle of the Bastards» أفضل معركة في المسلسل.

ويمكن ما تكونش دي النهاية. ممكن يطلع فيه رابط مستمر لبران بسبب العلامة على إيده. ممكن يكون الوايت ووكرز بياخدوا وقت على ما ينضجوا ويتحوِّلوا بالكامل، فابن كراستر اللي شوفناه بيتحوِّل في الموسم الرابع هيكون بمثابة خطر جديد في المستقبل. جايز، لكن أنا مش مهتم أوي الحقيقة. الحلقات الجايَّة هتفرَّج عليها بالقصور الذاتي وهكتب عن اللي عجبني وما عجبنيش برضه. لكن المجمل، الحلقة كانت محبِطة وخالفت التوقُّعات بصورة سيئة خالية من الحِرفيَّة في الكتابة. بصريًّا مبهرة -من اللي عرفنا نشوفه على الأقل- لكن ده أفضل ما يمكن أن يقال عنها.

فاكرين «Lost»؟

ملاحظات على الحلقة الثانية من «Game of Thrones»

الموسم الأخير، الحلقة الثانية، «A Knight of the Seven Kingdoms»

هدوء ما قبل العاصفة.

في التليفزيون الأمريكي مصطلح ظهر في الستينات اسمه «bottle show/episode» أو «حلقة زجاجة»، معناه حلقة من مسلسل بتدور أحداثها كلها أو أكثر أحداثها في لوكيشن محدود، وبيتكوَّن أغلب مشاهدها من الحوار، وعادةً بتكون تمهيد لشيء كبير قرب بداية أو نهاية موسم المسلسل، عادةً لتوفير الميزانية لحلقات فيها أحداث أكبر، «كأنك بتطلَّعها من زجاجة زي جني علاء الدين» على حد تعبير مبتكِر المصطلح. الموضوع بدأ بالشكل ده، لكن مع الوقت ما عادش بيتعمل للأسباب دي بس، وأصبح بيلجأ ليه كتَّاب الدراما لكتابة حلقات مبنيَّة على لحظات الشخصيات وتطويرها فقط، بغض النظر عن الميزانية. من الأمثلة الشهيرة على الحلقات دي «The Chinese Rertaurant» في «Seinfeld»، «Rixty Minutes» في «Rick and Morty»، وطبعًا «Fly» في «Breaking Bad».

إلى حد كبير تنطبق فكرة الحلقة الزجاجة على الحلقة دي. أكثر المشاهد قائم بشكل أساسي على الحوار المنطوق أو الصامت بين الشخصيات، أكثرها في لوكيشن محدود، وأكثرها تمهيد للمعركة القادمة، ولو إن لازم أقول إن الجزء الأول من الحلقة حسِّسني إنه مجرد تكملة للحلقة الأولى، وكان ممكن بسهولة يكون جزء منها. ده يمكن راجع إلى حدٍّ ما لكون المخرج واحد، والإخراج هنا ما كانش رائع بشكل عام، لكن في الوقت نفسه كان رائع بشكل خاص في عدد معيَّن من المشاهد. وبما إن الحلقة قائمة أساسًا على الشخصيات فالكتابة كانت البطل هنا.

ده مش معناه طبعًا إن الحلقة خالية من العيوب، بس خلينا نبدأ من البداية.

زي ما توقَّع كتير، المقدِّمة بيظهر فيها تقدُّم الوايت ووكرز على الخريطة. أضف لده ظهور استعدادات الدفاع في وينترفل. الجديد كمان اللي لاحظته في المقدِّمة دي ظهور(جزيرة الوجوه) على الخريطة، الجزيرة اللي في منتصف بحيرة (عين الآلهة) في أراضي النهر، وتُعد مركز أشجار الويروود في وستروس، والمكان اللي وقَّع فيه البشر مع أطفال الغابة ميثاق الهدنة. يمكن يكون ليها دور في المسلسل، لكن لو ده حقيقي فكنت أتمنَّى يذكروا اسمها ولو مرَّة قبل كده. الأكيد إن هيكون ليها دور ما في الكُتب لأنها اتذكرت كذا مرَّة، آخرها في قصة هاولاند ريد قبل ما يحضر دورة المباريات الكُبرى في هارنهال، الحدث اللي التقى فيه ريجار وليانا أول مرَّة.

زي ما توقَّع كتير (الجملة دي هتتكرَّر كتير الموسم ده)، وزي ما عرفنا من تريلر الموسم، چايمي طلع سليم من مواجهته مع مجلس القيادة في وينترفل ومع بران. كان معروف إن تيريون هيدافع عن أخوه، كان معروف إن بِريان هتشهد له، كان معروف إن بران مش هيهتم ومش هيفضحه. تنفيذ كل ده كان حلو، لكن مشهده مع بران كان فعلًا محتاج يكون أطول من كده، لأن تنفيذه إداني إحساس بإنه أداء واجب وبس. اللي عجبني بشكل خاص إن چايمي ما دافعش عن نفسه وقال لدنيرس أبوكي كان وحش مجنون إلخ... لأننا سمعنا القصة بما فيه الكفاية، لكن الأهم إن ده متسق مع شخصية چايمي. لاحظ إنه ما حاولش يدافع عن اللي عمله ولا مرة قبل كده، ولا حاول يبرَّر لند ستارك، وما حكاش اللي حصل أصلًا إلا سرًّا لتيريون أو في ظرف خاص زي مشهده في الحمام مع بِريان.

لكن بتساءل: بران عارف دلوقت إن چايمي قد يكون مهم في المعركة اللي جاية. هل من الناحية القتالية رغم إن چايمي ما عادش المحارب القدير اللي كانه؟ هل فيه دور هيلعبه ضد ملك الليل؟ هل هو اللي هيقتل ملك الليل؟ (التعبير اللي استخدمه تورموند King Killer ممكن يكون إشارة لده). في جميع الأحوال، بران عارف ده دلوقت أو بيتكهَّن بيه بعد ما أصبح الغُداف ذو الثلاثة أعيُن، لكنه ما كانش يعرفه وهو لسا براندون ستارك، فبتساءل ليه ما قالش لحد قبل كده اللي عمله چايمي، وليه ما فضحهوش هو وسرسي وقت حرب الملوك الخمسة؟ في الكُتب بران مش فاكر وقع من البرج إزاي، غالبًا لأن الغُداف (الغُراب في الكُتب) تلاعب بذاكرته. ما هياش نقطة محوريَّة لكن جات على بالي.

إذن اتَّضح إن ما فيش مؤامرة بين تيريون وسرسي، ما فيش اتفاق سري. الموضوع ببساطة إن تيريون كان غبي لأسباب تطلبتها الحبكة فقط علشان حاجات معيَّنة تحصل، مش بناءً على أي دراما حقيقية في شخصيته. ما علينا. الحوارات بينه وبين چايمي كانت ممتازة في الحلقة دي، وعن نفسي كنت أتمنَّى تايوين لانستر يكون موجود دلوقت، مش علشان السبب اللي ذكره تيريون، علشان كنت أحب فعلًا أشوف كان ممكن يواجه الوايت ووكرز إزاي في السيناريو ده. على كل حال، أنا مبسوط نوعًا إن تيريون بدأ يرجع أخيرًا للفورمة القديمة، وإن الديالوج بتاعه اتطوَّر وبيقول حاجات ليها معنى رغم بساطتها الظاهريَّة. تيريون اللي نعرفه، تيريون الحقيقي، أكثر حاجة مميَّزة فيه هي عقله، وأظن إنه في لحظةٍ ما ممكن يتوصَّل إلى حلٍّ ما لمشكلةٍ ما بناءً على الحكاية اللي حكاها له بران.

عارف إن فيه ناس عندها مشكلة مع مشهد آريا وجندري، غالبًا لأننا نعرف البنت من وهي طفلة، لكن في سياق العالم الداخلي وبمقاييس العصور الوسطى في عالمنا الموضوع منطقي تمامًا، ولو إن المشهد فكَّرني بمشهد سخيف مشابه في النسخة المطوَّلة من «Independence Day» الشخصيَّات اللي فيه مراهقة برضه. وبالمناسبة، اللي قرأ فصل اسمه «Mercy» من «رياح الشتاء» على مدوَّنته من سنتين تقريبًا هيلاقي الكلام ده هيِّن مقارنةً باللي مكتوب، خصوصًا إن آريا في الكُتب ما زالت طفلة، لكن -مرة تانية- دي طبيعة العالم في وستروس، وكانت طبيعته في أوروپا وغيرها في العصور الوسطى.

سانزا أصبحت شخصيتي المفضلة رقم 2 بعد چايمي. ما كنتش متوقِّع ده يحصل، خصوصًا إني مش بحب صوفي ترنر إطلاقًا، وبكره سانزا وفصولها في الكُتب، لكن ده اللي حصل. مبسوط فشخ إن مشهدها مع دنيرس ما انتهاش بالاتفاق، والمشهد بشكل عام عجبني لأنه فيه روح المسلسل الأصليَّة -زي أغلب الحلقة- إن كل شخصيَّة ليها وجهة نظر تستحق أخذها بعين الاعتبار على الأقل. كمان معترف بإن لقاءها بثيون كان مؤثِّر رغم إني بطَّلت أهتم بأي حاجة ثيون... ثيون اللي وصل وينترفل من كينجز لاندنج خلال يومين... الحبكة عايزاه يكون في المعركة بأه.

مشهد داڤوس مع البنت الصغيرة. حقيقي ما كانش فيه داعي يكون على وش البنت حرق علشان تفكَّر داڤوس أو تفكَّرنا كمشاهدين بشيرين باراثيون. أي طفلة كانت هتخلِّي الرابط يتداعى إلى عقولنا في الحال. ما فيش داعي تحشر المعلومة حشرًا في زوري يا كوجمان!

أنا بكره ليانا مورمونت، بكرهها بكرهها بكرهها! موتي بأه يعلن أم تناحتك!

مشهد آريا مع ساندور ودونداريون ما لهوش أي لازمة. أداء واجب ومجرَّد إنهم يعملوا علامة صح على الشخصيَّات اللي لازم تظهر في الحلقة.

جميل مشهد چون وسام وإد فوق أسوار وينترفل، كأنه مشهد من أيامهم الخوالي فوق الجِدار. سعيد بظهور جوست أخيرًا، لكن بما إنهم بيعملوا fan-service فكان المفروض عليهم يورُّونا لقاء چون بيه بعد رجوعه، وكنت أحب أشوف جوست هيتصرَّف في وجود التنانين إزاي. هل جوست هيكون في المعركة؟ روب ستارك كان بيحارب وجراي ويند معاه، لكن جوست ما كانش في معركة النَّغِليْن (لأسباب إنتاجيَّة؟). جوست لو مات أنا هزعل عليه أكتر من أي شخصيَّة تانية.

مشهد تنصيب بِريان فارس هو الأفضل في الحلقة طبعًا بإجماع الجميع. عجبني جدًّا الطابع المسرحي للمشهد، من الإضاءة رغم خفوتها للوكيشن الواسع اللي بيدِّيك انطباع إنهم على خشبة مسرح فعلًا، لتمثيل جويندلين كريستي، للطابع الشيكسپيري الكلاسيكي للقَسم، مع الموسيقى الجميلة، حتى التصفيق في النهاية. اللي قرأ الروايات، «وليمة للغِربان» بالذات هيعرف ليه المشهد ده مهم، ومتوقَّع بل ومنتظَر.

بالمناسبة، بوجود چايمي وبِريان في مكان واحد دي أول مرَّة يرجع فيها سيف ند ستارك إلى وينترفل من وقت ما سابها.

في مشهد چون ودنيرس عجبني تمثيل إميليا كلارك أكثر من قبل كده (بحبَّها والله لكن هي ممثلة متوسِّطة المستوى)، لكن زي ما توقَّعت وتوقَّع كتير وصول الوايت ووكرز حال دون الخوض في الحوار. الحلو هنا برضه إن لكل واحد فيهم وجهة نظر تستاهل تفكَّر فيها شوية، وجهة نظر مبنيَّة على شخصيته وأسسها ودوافعها.

المشهد الأخير هو المشهد الختامي المثالي للحلقة، استعدادًا للحلقة الأطول في تاريخ المسلسل، والمعركة الأكبر في تاريخ التليفزيون والسينما (على حد زعمهم). الحلقة كانت ختام مناسب جدًّا لقصة كذا شخصيَّة. چورا مورمونت قصته اكتملت: تخلَّى عن فكرة إنه يكون الشخص الأقرب لدنيرس، نال العفو أو الوفاق من بنت عمه، معاه سيف ڤاليري زي السيف اللي كان مفروض يورثه، أخيرًا هيقاتل تكريمًا لذكرى أبوه. چايمي قصته اكتملت: تخلَّى عن سرسي تمامًا ومدين بالولاء لملكة ثانية، نال العفو عن جرائمه، جاهز يحارب كجندي في جيش بعد ما كان قائد جيوش. سام تخلَّى عن جُبنه تمامًا. جراي وورم بيخطَّط للمستقبل مع ميسانداي، وهو معناه إن حد فيهم هيموت، غالبًا هو إن لم يكن هي كمان. (راجع الحوار الحميم الأخير بين روب وتاليسا قبل المذبحة). بِريان قصتها اكتملت: وفت بوعدها لكاتلين ستارك، أصبحت الفارس المرأة الأول في تاريخ الممالك السبع على حد علمنا، هتحارب في سبيل قضية نبيلة أكبر من الملوك مش لمجرَّد ملك زي رنلي. باختصار، فيه شخصيَّات مش فاضل حاجة تعملها غير إنها تموت، لأنها اكتملت دراميًّا.

بالنسبة لخطة الدفاع فأنا متغاظ. أولًا لأنهم لسا بيتناقشوا فيها دلوقت قبل ساعات من وصول العدو، وثانيًا لأن ما فيش أي ذكر برضه للتنِّين اللي مع ملك الليل واستعدادهم لمواجهته. اللي أعرفه ومتأكِّد منه إن الواقع هيخالف الخطَّة تمامًا لأن دي تيمة متكرِّرة في روايات مارتن، خصوصًا في ما يتعلَّق بالمعارك. طبعًا تكرارهم 4 مرات تقريبًا الكلام عن أمان الاختباء في السراديب معناه إن دي آخر حاجة ممكنة. على حسب قدرات ملك الليل، لكن فيه احتمال إنه يكون قادر على تحريك الموتى اللي في السراديب، وده معناه إن الخطر هيكون من الخارج والداخل. هل المشهد اللي آريا بتهرب فيه في التريلر، تكون بتهرب من جثة أبوها بدون رأس؟ أو من جثة ريكون؟

هل دافع ملك الليل فعلًا هو القضاء على الحياة بالكامل ولا ده مجرَّد تكهُّن من بران؟ في الحلقة دي اتعرَّفنا على حدود معيَّنة لقدرات بران. هل لو هو ده الهدف فعلًا فهو مُرضي؟ عن نفسي عمري ما حبيت فكرة إن غاية الشرير الأكبر هي القضاء على البشر، خصوصًا في أفلام السوپر هيروز، وحتى في «The Lord of the Rings»، لأن بعد كده إيه؟ أتمنَّى يكون الهدف مش مقتصر على ده. وعلى كل حال حتى لو قضى على وستروس كلها، فإسوس وغيرها موجودة، والوايت ووكرز -زي ما قالوا لنا- مش بيعدُّوا البحر... إلا إذا لو اتعلموا الإبحار.

أجمل ما في الحلقة طبعًا هو الأغنيَّة. في الكُتب البيت الأول منها فقط مذكور في «عاصفة السيوف»، أما الباقي فمكتوب للمسلسل. الأغنية فعلًا حلوة وحزينة سواء بصوت پودريك أو بصوت فلورنس. فكَّرتني بأغنية پيپين لدنيثور في «The Return of the King» قبل حصار ميناس تيريث. چيني من الشخصيَّات اللي بنسمع عنها في الكُتب، وفيه تخمين إنها ماتت في نفس حريق (قلعة الصيف) اللي ريجار تارجاريَن اتولد خلاله، نفس الحادثة اللي مات فيها السير دنكان الطويل وإجون تارجاريَن الخامس (إج)، البطلين اللي اتسمِّت على مغامراتهم مجموعة من الروايات القصيرة لمارتن بنفس عنوان الحلقة. هنا ممكن تلاقي محاولة مني لترجمة الأغنية بشكل غير حرفي. كمان المونتاچ اللي مع الأغنية فكَّرني بالحلقات الأولى من «Lost» اللي عادةً ما كانت بتنتهي بالشكل نفسه.

فيه حاجتين غاظوني بشكل خاص. الأولى لما داڤوس بيقول إنه ابتعد عن الحروب لحد معركة النَّغِليْن، كأنه ما تسلَّلش لستورمز إند في وقت الحرب بالسمك والبصل لستانيس، وكأنه ما شاركش في معركة بلاكووتر وابنه مات فيها وكان هيغرق وفضل في البحر من غير أكل أو شرب أيام. لكن آه، المعركة اللي شارك فيها 10 دقايق هي اللي غيَّرته. الأنكى إن تيريون بيجيب سيرة نجاته من معركة بلاكووتر بعدها!

الحاجة الثانية تغيظ بشكل خاص لقرَّاء الكُتب، لما تيريون بيقول إن الشماليِّين فاكرين آخر مرَّة تارجاريَن جاب فيها تنانين الشمال. الحقيقة إن ما حصلش حاجة! آخر مرة ده حصل كانت زيارة من الملك چهيرس  الأول والملكة أليسين ومعاهم 6 تنانين ونزلوا في ضيافة اللورد ألاريك ستارك. وقبل كده لما الملك تورين ستارك ركع لإجون تارجاريَن ما حصلش أي قتال، والتنانين ما دخلتش الشمال أصلًا. فتيريون جايب الكلام ده منين مش عارف، لأنه مش مبني حتى على أي حاجة اتقالت قبل كده في المسلسل.

إجمالًا الحلقة حلوة فعلًا، وفكَّرتني بالمسلسل في مواسمه الأولى.

أغنية چيني

ترجمة غير حرفيَّة لهشام فهمي

عاليًا في أبهاء الملوك الخالين

كانت چيني تَرقُص مع أشباحها

الذين فقدَتهم والذين وجدَتهم

والذين كانوا أكثر مَن أحبَّها

مَن رحلوا منذ أزمنةٍ طويلة

لم تَعُد تَذكُر أسماءهم

وقد راحوا يُدوِّرونها على الأحجار العتيقة البَليلة

فطردوا ما في نفسها من حزنٍ وألم

ولم ترغب لحظةً في الرحيل، لم ترغب لحظةً في الرحيل

لم ترغب لحظةً في الرحيل، لم ترغب لحظةً في الرحيل

رقصوا طيلة النهار وحتى توغَّل الليل

عبر الثلوج التي تغمر الفِناء

من شتاءٍ إلى صيفٍ إلى شتاءٍ جديد

إلى أن تداعَت الجُدران وأدركَها الفَناء

ولم ترغب لحظةً في الرحيل، لم ترغب لحظةً في الرحيل

لم ترغب لحظةً في الرحيل، لم ترغب لحظةً في الرحيل

https://www.youtube.com/watch?v=eTa1jHk1Lxc

چون أوليڤر يكتب عن محمد صلاح

مو صلاح إنسان أفضل من لاعب كرة قدم، مع العلم أنه أحد أفضل لاعبي كرة القدم في العالم.

ستلقى صعوبةً في العثور على رياضي محترف في أيِّ رياضة لم يتأثَّر بنجاحه ومكانته مِثل مو، وهذا شيء مُدهش، لأنني لا أتخيَّلُ نوع الضغط الذي يتعرَّض إليه مقرونًا بالمحبَّة الشديدة التي ينالها. مو نموذج أيقوني للمصريِّين ومشجِّعي ليڤرپول والمسلمين في جميع أنحاء العالم، وعلى الرغم من هذا يُعطي الانطباع بأنه رجل متواضع خفيف الظِّل مراعٍ للآخرين، لا يأخذ شيئًا من هذا بجديَّة أكثر من اللازم.

كلاعب كرة قدم يلعب مو بابتهاجٍ مُعدٍ. لطالما تساءلتُ عن شعوري لو كنتُ قادرًا على اللعب ببراعته، ولمَّا تُشاهد وجهه يُشرق حين يفعل شيئًا مُدهشًا ينتابك إحساس مطمئِن بأن الأمر بالمتعة التي تُريدها بالضبط.

إنني أحبُّه للغاية.

من قائمة مجلة «TIME» لأكثر 100 شخصية مؤثِّرة في العالم لعام 2019.

ملاحظات على الحلقة الأولى من «Game of Thrones»

الموسم الأخير، الحلقة الأولى، «Winterfell»

أظنها أفضل حلقة أولى حصلنا عليها من كذا سنة، يمكن من وقت الموسم الرابع.

المقدِّمة الجديدة الأول. فشيخة! حد كان متوقِّع أقل من كده؟ ودلوقت بدل ما كانت فيه مشاهد تاريخية معروضة على الأسطرلاب زي ثورة روبرت، أصبحت فيه مشاهد من القصة الحالية، زي سقوط الجدار والزفاف الأحمر والمذنَّب. المقدِّمة الجديدة محدودة زي ما القصَّة رغم إنها كبرت جدًّا أصبحت محدودة.

إحنا متعوِّدين على كل حال إن كل الحلقات الأولى في المسلسل بطيئة إلى حدٍّ ما، مجرَّد تمهيد ورص لقطع اللعبة في أماكنها على اللوحة مع بداية كل شوط. فيه ناس شايفة إن الحلقة ما حصلش فيها حاجة تقريبًا، وده مش صحيح، بالعكس الحلقة حصل فيها كذا حاجة مهمَّة، لكن يمكن علشان ده الموسم الأخير، وإن توقُّعاتنا إن كل حلقة لازم تبقى مشحونة على آخرها بكل الحاجات المهمة، فده اللي مدي انطباع إنها حلقة تقليديَّة. أضِف لده فكرة انسحاب عنصر المفاجأة اللي متعوِّدين عليه من البداية، مقابل إن أغلب اللي هيحصل متوقَّع بشكل أو بآخر، لأن بطبيعة الحال الخيوط الرئيسية للقصة أصبحت معدودة، والحبكة أصبحت بتدور في نطاق ضيق جدًّا منحصر في مكانين أو ثلاثة، ومصاير الشخصيات وتخمينات النهاية قُتلت كلامًا. أخشى إن ما فيش مفر من ده غير إن على الأقل الحاجات المتوقَّعة كلها تتقدم لينا بشكل لائق، مش مجرَّد تتقدِّم وخلاص ما داموا عارفين إننا كده كده متوقِّعينها.

خُد مثلًا ركوب چون سنو التنِّين. المشهد بصريًّا عظيم ومتنفِّذ بحرفيَّة عالية. عن نفسي استمتعت بالموسيقى والمناظر الطبيعية اللي صوَّروا فيها، لكن لأن كلنا كنا عارفين إن چون هيركب التنِّين المتسمي على اسم أبوه، ولأن سياق المشهد كان خفيف تمامًا فما كانش في الموضوع أي tension، مش زي المشهد اللي ركبت فيه دنيرس دروجون للمرة الأولى. كلنا عارفين إن چون هيركب، وإن التنِّين هيتقبَّله. اللي ما يعرفش ده المفروض يبقى دنيرس نفسها، اللي المفروض إنها عارفة تاريخ التنانين -راجع هدية چورا مورمونت لها في زفافها على دروجو- وعارفة إن أصحاب الدماء الڤاليرية فقط هم اللي يقدروا يركبوا التنانين، وعلى حد علمها چون وستروسي شمالي 100%، فبالتالي المفروض تكون عارفة إن النتيجة الواقعية الوحيدة إن فعلًا باي باي چون سنو! زد على ده إنها مش بتتفاجئ ولا بتبدي أي دهشة لما چون ينجح فعلًا. كانت عندهم فرصة يثيروا التساؤلات في نفس دنيرس، تمهيدًا لمعرفتها الحقيقة.

مشهد معرفة چون الحقيقة من سام كلنا كنا منتظرينه بالفعل، لكن في الحالة دي سياق المشهد والتنفيذ كانوا ممتازين. أولًا تسليط الكاميرا على وش چون ورد فعله اختيار ذكي من المخرج. الأفضل إن سام راح قال له، لأن في اللحظة دي مش المهم إن بران قال إن الوقت جه، ولا المهم إن چون لازم يعرف الحقيقة لمجرد إنه لازم يعرفها، المهم إن چون يعرف حقيقة دنيرس أكتر من حقيقة نفسه. الإفصاح بالمعلومة مبني كله على رد فعل سام على إعدام أبوه وأخوه، إن من وجهة نظره الملكة دي متوحشة، وما هياش زي چون، مش هتتنازل عن التاج في سبيل شعبها. سام عارف إن چون هيكون ملك صالح، بغض النظر عن رأي چون نفسه.

قصة دنيرس كلها مبنيَّة على إنها الأحق بالحكم، ده كل الدافع بتاعها اللي بيحرَّكها من البداية تقريبًا، على الأقل من بعد موت ڤسيرس، فهيكون مثير للاهتمام نشوف رد فعلها على الحقيقة، وهل هيكون فيه توتُّر في العلاقة بينها وبين چون ولا لأ. التخمين الأقرب للواقع هو إن آه، هيكون فيه توتُّر لكن وصول العدو هيزيح كل ده على جنب، ولاحقًا مش هيضطرُّوا لمواجهة مشكلة الحكم أصلًا لأن واحد منهم على الأقل هيموت. دي برضه من مشاكل إنك تبقى متوقِّع المسار رايح على فين. على العموم عاجبني فتح نقاش إن چون ركع لدنيرس علشان بيحبها، لأنه بالفعل عمل كده بعد ما قالت إنها هتحارب معاه. يمكن لقاها فرصة للتخلص من عبء الحكم اللي هو ما كانش راغب فيه أصلًا. كان الخط ده هيكون أجمل لو كان فيه كيميا كفاية بين كيت هارينجتون وإميليا كلارك. أنا شايف إنها أفضل شوية عما كانت قبل كده، لكن شوية صغيرة مش مخلياهم مقنعين، خصوصًا لما المسلسل يدينا لحظة cute فما يلاقيش إلا إعادة صياغة كلام چون وإيجريت قبل مشهد الكهف، مشهد كانت فيه الكيميا بين الممثلين أعلى بكتير.

يمكن تعامل دنيرس المتعالي مع الشماليِّين من منطلق استحقاقها تكون الملكة، مع لمسة القسوة اللي إحنا عارفينها منها، كونها سبق وأعدمت ناس كتير، منهم بالحرق، وكان منهم ناس تقدر تعفو عنهم، زائد إن ممكن يحصل صدام بينها وبين چون، يكون تمهيد لأن العدو الأخير يكون دنيرس نفسها مش سرسي. ده مجرَّد تخمين، لكن ممكن يكون اتجاه جيد لو اتعالج بجودة.

المتوقَّع كمان كان كل الشخصيات اللي بتلتقي للمرة الأولى من زمان. كلها مشاهد كويسة في رأيي، خصوصًا چون وآريا.

لازم أقول إن يورون جرايچوي عاجبني أكتر المرة دي. الحقيقة مشهده مع يارا كان ظريف فعلًا، ولو كانوا لسا بيخصَّصوا وقت كفاية لتطوير الشخصيات زي زمان كنت هستمتع بكلامه معاها، وفكرة إن يورون على جبروته إنسان وحيد مالوش أصدقاء ومش لاقي حد يتكلِّم معاه إلا أسيرته. كان هيبقى تطوير كويِّس لشخصية يارا برضه، لكن طبعًا ما فيش وقت للحاجات الصغيرة دي دلوقت.

الممثِّل اللي عامل يورون فيه كيميا حلوة بينه وبين لينا هيدي. هل سرسي هتستغل يورون وتعلن إنه أبو طفلها؟ هل هي حامل أصلًا؟ مش هنقيس بشربها النبيذ لأنهم مش في عالم متقدِّم طبيًّا. لاحظ لحد الخمسينات الحوامل كانوا بيدخَّنوا ويشربوا عادي. وعلى سيرة سرسي، أنا فعلًا فعلًا مش شايفها ملكة مجنونة بأي شكل! متوحشة وقاسية؟ أكيد، لكن مجنونة لأ. لكن ده ما يعنيش إنها مش الملكة الغبية، لأنها مش مدركة إن لو الموتى انتصروا في الحرب فكل اللي ماتوا هيكونوا جزء من جيشهم، بما فيهم التنانين! أما إن برون يقتل تيريون أو چايمي فإحنا عارفين إن ده مش هيحصل.

طبعًا كان نفسي أشوف أفيال زي ما في الكُتب لكن واضح إن الميزانية ما كفِّتش، ولا كفِّت جوست حتى! مش مشهد لقاء چون وجوست حاجة كلنا مستنيِّينها؟ مع كل الـfan service اللي بيعملوها وبرضه مفيش جوست؟

رغم إن ثيون أنقذ أخته بسهولة تامة (حد لاحظ الواد بتاع «It's Always Sunny in Philadelphia» في المشهد ده؟) فأنا حقيقةً ما عدتش مهتم باللي بيعمله ثيون من موسمين على الأقل، ولا يارا الحقيقة. يمكن كويس إن مش كل قصته الموسم ده إنه ينقذ أخته، فهنشوف بالمنظر ده ممكن يخلُّوه يعمل حاجة مهمة ولا إيه.

مش عايز أتكلِّم عن تيريون لأن اللي عملوه في شخصيته عيب فعلًا. Shame عليهم إن تيريون يتحوِّل لمجرَّد واحد بيقول نكت أو يكرر كلام اتقال قبل كده مرَّات ومرَّات. الكلام نفسه ينطبق على ڤارس وعلى داڤوس. الشخصيَّات دي أصبحت مخصيَّة دراميًّا.

جميل إنهم فتحوا مسألة المؤن اللي تكفِّي أعداد الجيوش دي كلها، لكن أنا والله متأكِّد إن دي هتكون أول وآخر مرة تتفتح فيها.

مشهد ند أومبر رائع، وده عنصر الرعب الخالص اللي المسلسل قلَّما قدمه قبل كده.

ليانا مورمونت بقت بتنرفزني فعلًا. كفاية عليها كده لأنها شخصية مستفزة وسبب وجودها الوحيد إن فيه شريحة كبيرة من الجمهور بتحبها.

أخيرًا، عجبني تشابه لقطات مع لقطات من الحلقة الأولى، زي وصول الملك(ة) وينترفل مع نفس الموسيقى، برون وتيريون وسط مجموعة من العاهرات، الطفل الصغير اللي هو مزيج بين بران وآريا لحظة وصول الموكب، چون وند عند شجرة الويروود، رموز الوايت ووكرز، السراديب، إلخ...

حين بدأت كتابة «لعبة العروش» لم أكن أعرف شكل الحصان

   چورچ ر. ر. مارتن

   ترجمة: هشام فهمي

يعرف محبُّو روايات ’أغنية الجليد والنار‘ ومسلسل Game of Thrones المأخوذ عنها أن ظهور الخيول يتكرَّر كثيرًا في السلسلة، ويفترض البعض أني كنتُ أملكُ -على أقلِّ تقدير- معرفةً عابرةً بالخيول عندما بدأتُ كتابة هذه الروايات، لكن الحقيقة أنني لم أكن قد رأيتُ حصانًا واحدًا في حياتي عندما بدأتُ الكتابة، بل ولم أكن أملكُ أدنى فكرة عن شكل الحصان.

كنتُ أعرفُ أن الحصان حيوان ما، لكن في ما عدا ذلك كان تصوُّري لشكل هذا الحيوان مبنيًّا بالكامل على ما سمعته من أقاويل الناس، بالإضافة إلى تخميني الشَّخصي.

بالطَّبع وجدتُ وسائل للتَّحايُل على جهلي بشكل الحصان خلال الكتابة. عندما تقرأ الكتاب الثاني ’صِدام الملوك‘، سترى أني في إحدى الفقرات أشرتُ إلى أن هناك «بعض الخيول تقليديَّة كبيرة الحجم خارج البوَّابة»، وأني ذكرتُ على مدار الكتاب عدَّة مرَّات أن هذا أو ذاك يمتطي «حصانًا بحجم الحصان». لقد افترضتُ أني، بتلافي الدخول في تفاصيل عن لون الحصان أو شكله أو نوعه، سأستطيعُ الاستمرار دون أن يُلاحِظ أحد.

لكن كان من المحتَّم أن أخطئ تمامًا في بعض المواضع، مثل «عجلات حصان تايوين لانستر الضخمة اللامعة»، أو «الخيول الواقفة خارج ستورمز إند تزمجر وتنبح غضبًا»، أو وصفي المتكرِّر لخيول الدوثراكي بأنها «تُحَلِّق بأجنحتها فوق الحقول». تلك الأوصاف بدت لي طبيعيَّة في ذلك الحين، لكني أرى الآن كيف وشت بجهلي بالخيول.

على سبيل المثال، لو كنتُ أعرفُ سُمك حجم الحصان الحقيقي، لأدركتُ أنه من غير الواقعي تمامًا أن أكتب أن چوفري خنقَ حصانًا بإصبعين فقط، وما زلتُ أعاني عند قراءة فقرات مثل هذه التي وردت في ’وليمة للغِربان‘:

«عنما التفتَت بريان، لاحظَت أن پودريك يجلس مرهقًا فوق صَدَفة حصانه، ويُطبِق بيديه على قرنيه الطويلين المدبَّبين كي لا يَسقُط.

قال الصبي بإنهاك: سيِّدتي، هل يمكننا أن نتوقَّف قليلًا؟

ثم وضع پودريك الحصان في جرابه وجلس ليستريح».

لكنك تتعلَّم أثناء الكتابة، والحياة تجعلك أكثر حكمة كذلك. أذكرُ أني كنتُ في منتصف ’رقصة مع التَّنانين‘ عندما رأيتُ صورةً لحصان على لوحة إعلانات. كانت لحظة تنوير، وقلتُ لنفسي: «أوه! إذن هكذا يبدو الحصان، وليس لديه منقار! هذا هو ما يجب أن أتخيَّله عندما أكتبُ عن الخيول». ومنذ ذلك الحين تعلَّمت المزيد، وقد أفادت معرفتي السلسلة كثيرًا على ما أعتقد. لستُ عالم حيوانات، لكني أعرفُ ما يكفي الآن أن أفهم أن الحصان لديه شَعر وذيل ومن المستحيل الخلط بين شكله وشكل الرجل أبدًا على الرغم مما يعتقده رووس بولتون. على كل حال، لقد نضجتُ ككاتب وأتمنى أن يُلاحظ قرَّائي الفارق.

مقال ساخر نُشر على موقع Clickhole في يونيو 2014